Prótese nos campamentos de refuxiados.
O pasado mes de novembro do 2009 a revista Dental Prótesis publicaba un artigo do compañeiro Antton Anduaga no que se poñía de manifesto a durísima situación humanitaria que está a vivir a poboación saharaui nos campamentos de refuxiados na Hamada en Tindouf (Alxeria) centrándose nas carencias en canto a asistencia bucodental.
A resposta a ese artigo foi tanto económica a título individual, como profesional. Dese xeito un grupo de protésicos e protésicas desprazámonos do 31 de marzo ata o 9 de abril aos campamentos para traballar como cooperantes, contamos coa colaboración de varios depósitos e laboratorios dentais que aportaron material diverso.
Nesta ocasión e durante unha semana, un grupo de 5 protésicos-as estivemos elaborando próteses removíbeis de acrílico para a poboación saharaui que puido desprazarse ata o Hospital Xeral de Rabunni no Campamento 27 de Octubre, diminuindo na medida do posíbel as listas de espera das persoas que precisan próteses.
